2010 онд АНУ-ын Аляск мужид 11 настай Элиот Кларк гэх хүү өөрийн гэр бүлийн гурван гишүүний хамт загасчилхаар нутгийн гол уруу явсан байна. Түүний эцэг болон хоёр авга ах нь голын эрэг дээр уургаа шидэн ухаан жолоогүй загасчилж байх үед гэнэт аварга том бор баавгай гарч ирсэн аж. Уг нь тэдэнд зэвсэг байсан боловч тэд дэндүү хол бөгөөд гагцхүү 11 настай бяцхан хүү л зэвсэгтэй ойр байжээ. Баавгай аав болон ах нарыг нь харан хөдөлгөөнгүй зогсож байсан тул хэн ч ямар ч хөдөлгөөн түрүүлж хийж зүрхлэхгүй байв. Ойролцоогоор 3 минут орчим тэд бие биенээ ширтэж байтал гэнэт баавгайн зан өөрчлөгдөн аймшигтайгаар дуугаран тэдэн уруу дайрч эхэлжээ.
Хүүгийн эцэг Элиотыг дуудан буугаар түүнийг бууд хэмээн орилоход сандарч тэвдсэн бяцхан хүү өмнө нь эцгийнхээ бууг хэрхэн цэнэглэж байсныг харсан тул бүхий л хурдаараа бууг цэнэглэн баавгайн зүг буудсан байна. Эхний сум баавгайг оносон боловч шархдуулж л амжжээ. Шархадсан баавгай улам бүр догширч аав болон ах нар уруу нь биш хүүгийн зүг дайрч эхэлсэн байна. Дахин нэг буудахад баавгайг оносон боловч араатан унаж өгөхгүй байсан тул хүү үргэлжлүүлэн буудсаар байв. 3 дахь сум нь баавгай бус газарт зоогдсон бөгөөд 4 дахь сумны дуу гарах үед баавгай газарт сөхрөн унажээ.
Уг баавгай нь 450 кг жинтэй 2,7 метр урттай ойн аварга том баавгай байсан юм. Тус үйл явдал Аляск мужийн Хуунах гэх тосгонд болсон бөгөөд 2010 онд баавгай хүний гарт амиа алдсан 3 дахь тохиолдол болон бүртгэгджээ. Хамгийн гайхамшигтай нь баавгайг унасны дараа хүүгийн эцэг хүү дээрээ очин бууг нь үзтэл ганц ч сум үлдээгүй байсан байна. Хэрэв сүүлчийн сумаар хүү оноогүй байсан бол тэднийг чухам ямар ирээдүй хүлээж байсныг бурхан л мэдэх биз.
