АНУ-ын 16 дахь ерөнхийлөгч Abraham Lincoln залуу насандаа маш их зүйлийг туулж өнгөрүүлсэн нэгэн байлаа. Тэрээр 1809 онд АНУ-ын Kentucky мужид төрсөн бөгөөд идэр залуухан 20 настайдаа гэрээсээ гарч Illinois мужийн “New Salem” хэмээх сууринд очин жижиг мухлагт туслах ажилтан хийн амьдрах болжээ. Түүнчлэн тэрээр бие даан хууль зүйн боловсрол эзэмшихийг хүсэж байсан бөгөөд уг хүслээ гүйцэлдүүлэхийн тулд нэлээдгүй мөнгө шаардагдаж байв. Иймээс мөрөөдлөө бодит болгохын тулд өөрийн онцгой чадвар болох хатуу чанга бие, хөдөлгөөний эвслээ ашиглан бооцоот барилдааны тэмцээнүүдэд ордог болов.
Нэгэн өдөр түүний дэлгүүрийн эзэн болох Denton Offutt-ыг тосгоны хамгийн чанга эр Jack Armstrong дэлгүүрт нь орж ирэн дээрэлхсэн байдаг. Үүнийг нь харсан Abraham Lincoln нэлээд тэссэний эцэст эзнээ өмөөрч түүнтэй муудалцсанаар уг маргааныг барилдаж шийдэхээр болжээ. Ийнхүү тэд барилдах өдрөө ч товлосон түүхтэй. Тухайн үед Jack Armstrong-оос муж тэр чигтээ айдаг байсан бөгөөд залуухан Lincoln-д оршин суугчид барилдаанаа зогсоож уучлалт гуйхыг хүсжээ. Учир нь өмнө нь хэн ч Jack-ыг барилдаанаар дийлж байгаагүй бөгөөд тэрээр барилдсан хүмүүсээ маш хүнд гэмтээдгээрээ цуутай нэгэн байв.
Түүхэн эх сурвалжид бичсэнээр тэдний барилдаан 3 минут орчим үргэлжилсэн гэх бөгөөд тухайн Abraham Lincoln тийм ч их хүч зарцуулалгүй нутгийн атаманыг буулгаж авсан байдаг. Jack анх удаа бусдад дийлдсэн нь энэ байлаа. Гэсэн ч тэрээр эр хүн шиг босон гар барьж инээмсэглээд дахиж тэдний дэлгүүрээр нэг ч орж ирээгүй юм. Түүнчлэн Abraham Lincoln тухайн ондоо Illinois мужийн бөхийн аварга болж нэлээдгүй нэр алдарт хүрсэн тул хууль зүйн боловсрол эзэмшихэд шаардагдаж байсан мөнгөө хангалттай олж чадсан түүхтэй.
