1942 оны үе бол АНУ-ын баруун эргийн мужуудийн хувьд тун ч их эгзэгтэй он жилүүд байлаа. Дэлхийн хоёрдугаар дайн ид өрнөж байх тухайн үед Японы онгоцнууд Номхон далайг гатлаад хэзээ ч АНУ-ын хилийн бүсийг даваад ороод ирж мэдэхээр байв. Хэрэв дайралт болбол хамгийн магадлал өндөртэй газар нь баруун эргийн Washington муж, нөгөөх нь California мужууд байлаа. Иймээс дэлхийн хоёрдугаар дайны үед АНУ тус хоёр муж уруу асар олон тооны агаараас хамгаалах их бууны анги нэгтгэлүүдийг зөөвөрлөн тэнд нь дайн дуустал байрлуулсан байдаг.
1942 оны 2-р сарын 24-ы өдрөөс 2-р сарын 25-нд шилжих шөнө агаарын улаан түгшүүрийн дохио зарласнаас уг үйл явдал эхэлсэн юм. Уг дохио нь улаан түгшүүр бөгөөд тэнгэр дайсны нисэх биет илэрсэн тул АНУ-ын их бууны анги нэгтгэлүүд бүх хүчээрээ тэнгэрт харагдаж буй хурц гэрлийн эсрэг гал нээсэн байдаг. Гал нээх үед гэрэл унтарсан боловч шөнийн тэнгэрт юу ч харагдахгүй байсан тул тасралтгүй гал нээсээр л байв. АНУ-ын арми өглөөний 4:14 минутад “бүх зүйл цэвэр” гэх мэдээ ирэх хүртэл тасралтгүй гал нээж 1400 гаруй их буугаар зэрэг буудсан юм.
Гэнэт аваарын дохио зарлаж их буугаар буудаж эхэлснээс болж Лос Анжелес хотод нийт 5 иргэн амиа алдсан байдаг. Тэдний гурав нь машины ослоор амиа алдсан бол хоёр нь зүрхний шигдээсээр хорвоог орхисон юм. Түүнчлэн хэд хэдэн барилгууд бага зэрэг гэмтсэнээс өөрөөр ямар ч хохирол учраагүй байна. Харин хамгийн сонирхолтой нь нэг ширхэг ч дайсны онгоц газарт унаагүй нь цэргүүдийн гайхшралыг төрүүлжээ. Тухайн үед дайны цаг үе байсан учир хэвлэл мэдээлэл уг үйл явдлыг дэвэргэхгүйгээр намжааж чадсан юм.
Дэлхийн хоёрдугаар дайны дараа холбоотнууд Японыг эзэлсний дараа тэдний цэргийн яамны архивыг нэгжихэд Япон улс Америкийн Калифорни муж уруу нэг ширхэг онгоц ч явуулж байгаагүй нь тогтоогдсон байдаг. Иймээс энэ бүх хачирхалтай үйл явдлууд хуйвалдааны онолд итгэгчдийн анхаарлыг хүссэн хүсээгүй үл мэдэгдэх нисдэг биет уруу татсан түүхтэй. Дэлхийн хоёрдугаар дайн дуусаж хүн төрөлхтөн сансарт нисэж чадсан үе бол хүн төрөлхтөн өмнөх бүх цаг үеүдээс хамгийн ихээр харийн ертөнцийг сонирхож байсан мөч байлаа. Хүн төрөлхтний уг сонирхол өнөөдрийг хүртэл үргэлжилсээр…
