1642 оноос 1651 оны хооронд Англи Улсад иргэний дайн дэгдэж парламентын тэнхимийг баримтлагчид болон язгууртны талыг баримтлагчид гэж хоёр хуваагдаад байв. Тулаан 7 жилийн турш үргэлжилсээр язгууртны талынханыг баримтлагчид ялагдал хүлээж үлдсэн хүчээ аван Их Британы арлын баруун урд өнцөгт Алтантын далайд орших Сицилийн арлууд уруу флотоо аван зугтсан байдаг. Саксончуудын арлын хуулийн дагуу бол хаан ширээг парламентын талыг баримтлагчид эзэмших ёстой байжээ. Тийм ч учраас эх газрын Европын Нидерланд улс парламентын талыг баримтлагчдын талд орж Английн төлөө тулалдахаар Сицилийн аралд нуугдсан урвагчдийг устгах зорилготой флотоо хөдөлгөсөн байдаг. Учир нь 1568-1648 онд Нидерланд улс Испаны хараат байсан бөгөөд Английн хатан хаан Элизбет I тэднийг тусгаар улс болгож өгөхөд тусалсан учир энэ удаа Недирландчууд хариуг нь барих шаардлагатай болсон байна.
Нидерландын усан флот хөдөлсөн мэдээг авсан язгууртны талыг баримтлагч John Granville Сицилийн арлуудыг Нидерландын эсрэг хүчээр дайн зарлуулсан байдаг. Тухайн үед Сицилийн арлууд нь нийтдээ 1500 гаруй оршин суугчтай байжээ. Ийнхүү хүчээр дайн зарлуулсны дараа 1651 оны 6-р сард Нидерланд болон Английн усан флот Сицилийн арлын дэргэд тулж ирэх үед язгууртны талыг баримтлагч John Granville бүх хөлөг онгоцоо аван тэдний өөдөөс тосон тулалдах гэж явсан боловч сүр хүчнээс нь эмээн бууж өгсөн байдаг. Язгууртны тал бууж өгснөөр Нидерландчууд тэдний бүхий л усан онгоцыг нь аван Сицилийн арлууд дээр хөлөө ч тавилгүйгээр гэртээ харьцгаажээ.
Ийнхүү азтай ч гэмээр эсвэл доромжлуулсан ч гэмээр байдалд орсон Сицилийн арлын оршин суугчид Нидерландыг чухам хэзээ ирж өөрсдийг нь хөнөөх бол хэмээх айдастай олон жил амьдарсаар сүүлдээ уг айдас нь замхарч аажимдаа он жилүүд арав арваараа улиран одож Сицилийн арлын цоо шинэ үе өсөж торних цагт тэд дайн зарласнаа ч мартаж орхижээ. Зуунаас зуун дамнан өнгөрсөөр Христосын тооллын 1986 он гарах үед Сицилийн арлын архиваас Нидерланд улстай 1651 онд албан ёсоор дайн зарласан тунхаглалыг санаандгүй байдлаар олсон боловч эргэн энхийн хэлэлцээр байгуулсан бичгийг олоогүй байна. Хөгжилтэй ч гэмээр, хөгтэй ч гэмээр байдалд орсон Сицилийн арлын ерөнхий сайд Лондон хотод орших Нидерландын элчин сайд Rein Huydecoper-тай холбогдож тухайн хоёр улс дайны байдалтай байгааг дуулгасан байна.
Хэрэг явдал иймд хүрсэн учир Нидерландын Засгийн газар ч мөн уг асуудлыг нягталж үзээд үнэхээр хоёр улс дайны байдалтай байгаа тухай олж мэдсэнээр 1986 оны 4-р сарын 17-ны өдөр Нидерландын элчин сайд Rein Huydecoper өөрийн биеэр Сицилийн арлуудад айлчлан энхийн хэлэлцээрт гарын үсэг зурж 335 жилийн турш үргэлжилсэн уг дайныг зогсоосон түүхтэй. Аз болж уг дайнд энэ олон жилийн турш нэг ч хүн амиа алдаагүй юм.
