Jim Sullivan бол 20-р зууны АНУ-ын хөгжмийн зохиолч, дуучин бөгөөд амьд хөгжмийн салбарын тун ч их ирээдүйтэй төлөөллүүдийн нэг байлаа. Тэрээр 1969 онд өөрийн анхны бие даасан цомог болох U.F.O цомгийг гаргасан байдаг. Уг цомгийн агуулга нь тэрээр өөрийгөө элсэн цөлд харь гаригийнханд хулгайлагдаж байгаа тухайн зөгнөж дүрслэн дуулсан түүхтэй. Харин хамгийн хачирхалтай үйл явдал 1975 оны 3-р сарын 6-ны өдөр буюу уг цомгийн нээлтээс 6 жилийн дараа болсон юм.
Тухайн оны 3-р сарын 5-ны өдөр тэрээр Los Angeles хотоос гарч New Mexico мужийг зорьсон бөгөөд өөрийн Volkswagen Beetle машиныг унаж явсан эр элсэн цөлд орших фермийн дэргэд ор сураггүй алга болжээ. Түүний машиныг олох үед бичиг баримт, гитар, багахан хэмжээний мансууруулах өвс болон мөнгө гээд бүхий л зүйлс нь яг байрандаа байжээ. Түүнчлэн машин дотор ямар ч гадны хүний хурууны хээ эсвэл халдлагын ул мөр байгаагүй аж.
Түүнчлэн цагдаа нар мөрдөн шалгасны эцэст түүнийг сураггүй болдог газрын ойролцоо дэн буудал хөлсөлсөн гэдгийг олж тогтоосон бөгөөд тухайн өрөөнд нэгжлэг хийхэд Jim Sullivan шөнө гадагш гарахдаа өрөөний түлхүүрийг яагаад ч юм өрөөнд нь үлдээгээд явсан байжээ. Түүнчлэн тэр шөнө өрөөндөө уух гэж доод дэлгүүрийн худалдагчаас өөртөө зориулан худалдан авсан виски нь ч түүний өрөөнд байсан байна. Түүний сураггүй болсон шалтгаан дэндүү сонирхолтой бөгөөд түүнд чухам юу тохиолдсоныг одоог хүртэл тогтоогоогүй л байна. Магадгүй хэн нэгэн түүний амь насанд халдсан байж болох ч тэрээр яг л ховстуулсан мэт шөнө дунд буудлын өрөөний түлхүүрээ ганцхан хормын өмнө уух гэж авсан вискитэйгээ хамт буудалдаа үлдээгээд эзгүй цөлд орших фермийн байшинг зүглэн явах ямар шаардлага байсан гэж? Түүний U.F.O цомгийг харь гаригийнхан сонсож тун таалагдсан тул хүслийг нь биелүүлж түүнийг хулгайлсан ч байж болох шүү дээ.
